Dors, min p'tit quinquin

Refrain :
Dors, min p'tit quinquin (1)
Min p'tit pouchin (2),
Min gros rojin (3) !
Te m'f'ras du chagrin
Si te n'dors point j'qu'à d'main.

Ainsi l'aut'jour eun' pauvr' dintellière
In amiclotant (4) sin p'tit garchon
Qui, d'puis tros quarts d'heure, n'faijot qu'braire
Tâchot l'indormir par eun' canchon (5).
Ell'li dijot :"Min Narcisse,
D'main t'aras du pain d'épice,
Du chuc (6) à gogo
Si t'es sache et qu'te fais dodo.

Et si te m'laich' faire eun' bonn' semaine,
J'irai dégager tin biau sarrau (7),
Tin patalon d'drap, tin giliet d'laine,
Comme un p'tit milord, te s'ras farau ( !
J't'acat'rai (9), l'jour d'la ducasse (10),
Un porichinell' cocasse,
Un turlututu
Pour jouernl'air du Capiau-pointu (11).

Nous irons dins l'cour (12) Jeanette-à-Vaques
Vir (13) les marionnett's. Comm' te riras,
Quand t'intindras dire : "Un doup' (14) pou' Jacques (15) !"
Pa' lporichinell' qui parl' magas (16),
Te li mettras dins s'menotte,
Au lieu d'doupe, un rond d'carotte !
Y t'dira : "Merci !"
Pins' (17) comm' nous arons du plaisi' !

Et si par hazard sin maite s'fâche,
Ch'est alors, Narciss', que nous rirons
Sans n'avoir invi', j'prindrai m'n air mache,
J'li dirai sin nom et ses surnoms,
J'li dirai des fariboles,
Y m'in répondra des drôles,
Infin, un chacun
Verra deux spectac' (18) au lieu d'un.

Alors serr'tes yeux, dors, min bonhomme,
J'vas dire eun' prière à Ptit-Jésus
Pour qu'y vienne ichi, pindant tin somme
T'fair' rêver qu'jai les mains plein's d'écus,
Pourqu'y t'apporte eun' coquille (19)
Avec du chirop qui guille (20)
Tout l'long d'tin minton,
Te pourlèqu'ras tros heur's de long !

L'mos qui vient, d'saint-Nicolas ch'est l'fête,
Pour sûr, au soir, y viendra t'trouver,
Y t'f'ra un sermon et t'laich'ra mette
Ind'zous du balot (21) un grand painnier,
Y l'rimplira, si t'es sache,
D'séquois (22) qui t'rindront bénache (23).
Sans cha, sin baudet,
T'invoira un grand martinet."

Ni les marionnett's ni l'pain d'épice
N'ont produit d'effet. Mais l'martinet
A vite rappajé (24) l'petit Narcisse
Qui craignot d'vir arriver l'baudet.
Il a dit s'canchon-dormoire,
S'mèr' l'a mis dins s'n ochennoire (25)
A r'pris si coussin (26)
Et répété vingt fos che r'frain:

Refrain.

(1) Mot d'affection
(2) Poussin
(3) Raisin, mot tendre
(4) En berçant
(5) Chanson
(6) Sucre
(7) Blouse
( Bien mis
(9) Je t'achèterai
(10) Fête locale
(11) Chapeau pointu
(12) Dans la ruelle
(13) Voir (14) Sou
(15) Nom de polichinelle
(16) Qui zézaye
(17) Pense
(18) Spectacle
(19) Gâteau offert à Noël
(20) Qui coule
(21) Tuyau de cheminée
(22) Choses
(23) Bien aise
(24) Apaisé
(25) Berceau
(26) Métier ou carreau de dentelle