السلام عليكم ورحمة الله تعالي وبركاته
سلام عليكم غالياتي انشاء الله تكونو كامل ملاح
بما انه رانا في وقت البرتقال جبتلكم اليوم صابلي جديد بذوق البرتقال لذيذ جدا
نبداو بالمقادير على بركة الله
250غ مرغرين طرية و نصف كاس زيت و نصف كاس سكر ناعم و نصف
كاس مايزينة وربع كاس عصيرالبرتقال و قشور حبة برتقال و نصف خمارة
و ملون برتقالي و الفرينة حتى تتلم العجينة
الكريمة
125 غ مرغرين طرية و 50 غ سكر ناعم و ربع كاس عسيلة و 50غ
شانتيي غبرة و كاس شاي عصير البرتقال و قشور البرتقال
الطلية
عصير البرتقال مصفى و سكر ناعم مغربل و ملون برتقالي
التحضييييييييييييييييييير
الكريمة
بالباتور نضرب المرغرين و السكر و عصير البرتقال و القشور و العسل
و نطلع مليح ثم نزيد الشانتيي بودرة حتى تطلع مليح و نخليها في الثلاجة حتى لوقت
الاستعمال ضروووووووووري جدا
العجينة
نضرب المرغرين و السكر و الزيت و الملون البرتقالي و نخدم
جيدا بالباتور او بكف اليد ونزيد عصير البرتقال و المايزينة و نصف خمارة و نلم
بالفرينة و اللون البرتقالي لازم يكون فاتح و نحل العجينة بالحلال
رقيقة كل واحدة و الشكل اللي تحبو انا خيرت القلب نطيبها كيما الصابلي عادي و
نخليه يبرد بعدها نجبد الكريمة و نلصق 2 حبات مع بعض تخرجلك حوالي 40 حبة متلاصقة
بعدها ناتي للطلية و هي تشبه للفوندون عصير البرتقال مصفي و ملون
برتقالي و سكر ناعم حتى يتلم الطلاء نطلي الحلوة و نخليها تنشف و نزينها
بعجينة اللوز او بالشكلاطة سوداء ا و حبة مندرين بعجينة اللوز او ممكن
تزينيها بنواد كوكو برتقالي كي ماتكونش للضياف و تدريلها من فوق حبة جوز
او لوز و تقدم في لكيسات رووووووعة خاصة لمحبي و عشاق البرتقال
نصائئئئئئح مهمة :
اولا العجيييييينة لازم نحلها شويا رقيقة حوالي نصف سم على
الاكثثثثر ونحله على نايلون باش يساعدنا وتحافظ على شكلها
ثانيا الفرن نشعللها من تحت ونطلع الصينية للفوق يعني تطييب كيما قاع لي صابلي واذا شفنا طابت
ومن تحت واحتجنا نشعله من فوق نشعله لدقائق قليلة فقط يطيب ولكن يجب ان لا يتغير لونه
حبيباتي الصابلي هش جدا راه يتكسر معاكم يعني لازم نلصق
بلطف يعني ديروا الكريمة كا مل على سطح الحبة الوحدة ثم
حطي اختاها فوقها بمعنى انك ما تحطيش الكريمة في الوسط وتقولي
نضغط عليها رايحة تخرج في الجوانب راهي هشة وتتكسر معاك
والطلاء حبيباتي العصير تاعه يكون مصفى عكس الكريمة والعجينة
والطلاء يكون خفيف شويا على الطلاء العادي تاع المخبببز
او التشاراك او........ يعني ثقيل لكن سائل نوعا ما
وما نغطسش الحبة في الطلاء بل نحطها على شباك تحته سنيوة صغيرة ونفرغ
الطلاء على الحبة بالمغرف وهي فوق الشباك واللي يقطر نعاود نستعمله عاديييييي
ونتركها تجف تماما ثم نحي بقايا الطلاء من تحت برفق بالسكيييين يعني نكرطها راهي هشة
باش يجي الشكل متحوف ثم نزين بالوردة والطلاء اللو ن المغاير وحسب الرغبة
وبالصحة والهناء
فى امان الله وحفظه
أمس في 10:51 من طرف Saida Farah
